A banda Luar na Lubre percorre todos os 'Camiños da fin da terra'

Os compoñentes da banda galega Luar na Lubre, que onte presentou o seu décimo traballo discográfico FOTO: Torrecilla (Efe)

A banda galega Luar na Lubre presentou onte en Madrid o seu décimo traballo discográfico, Camiños da fin da terra, 14 novos temas que abordan a fin da terra como eixe básico. Bieito Romero, instrumentista do grupo, recoñeceu que o que hai nestes momentos que a súa música "sexa coñecida" fóra de España é Internet, aínda que se dá o paradoxo de que debido á pirataría na rede o panorama do folk no noso país sexa "terrorífico".

Así o cualificou onte este integrante da banda de folk máis importante da península, ao tempo que sinalou que só en Youtube a banda recibiu máis de 25.000 entradas. Romero sinalou que o xeito de facer música do grupo segue latente neste último traballo. "Por un lado escollemos música tradicional pouco elaborada. Tamén incorporamos composicións propias e ademais facemos versións de cancións coñecidas", explicou. Este é o caso de Os animais que ademais serviu para editar un videoclip dedicado ao seu público máis fiel, o infantil.

Britonia, en recordo dos celtas bretóns; O son das augas, un xesto recoñecido ás augas que manan de fontes e montañas; A barca da pedra, un alalá moi antigo que narra como a Virxe chegou a terras de Muxía; María Soliña, personaxe histórico torturado pola Inquisición; ou Centeas, unha homenaxe ás conserveras, redeiras e lavadoras, son outros temas deste CD.

"Este é un disco relacionado coa maxia e a tradición que fan de Galicia un país diferente", sinalou. Máis de 21 anos despois da creación do grupo, Luar Na Lubre é agora "unha banda que toca mellor e que fai as cousas máis coidadamente". Algo produto da "veteranía", argumentou Romeiro. "Nós editamos un disco cada dous anos. Isto só se consegue tendo horario de traballador", indicou. Ter o seu disco dez na rúa non lles dá ningunha vertixe, senón que lles anima a seguir na brecha. "O que si nos dá vertixe é a encrucillada que está a vivir a música e que non sabemos a onde nos levará".

"O panorama do folk en España é terrorífico. Non hai industria, xa non se compra e o traballo que hai detrás non se valora. Esta é unha situación case límite porque todo se pode baixar de Internet", dixo. Paradoxalmente, para Bieito Romero hoxe as novas xeracións teñen unha gran calidade, aínda que se atopan a miúdo "coas portas pechadas".