O poeta de Noia Manuel López Rodrígues, Premio Suso Vaamonde

O noiés Manuel López Rodrígues resultou gañador do Premio de Poesía Suso Vaamonde 2008 coa obra Antítese nativa. O premio foi convocado pola Fundación Amigos de Galicia, en colaboración co Concello de Vilagarcía, e co patrocinio da secretaría xeral de Política Lingüística e da consellería de Presidencia.

O xurado tamén fixo pública a decisión do Premio de Relatos Curtos e Contos Daniel Hortas 2008, quen lle outorgou o primeiro premio a un traballo das alumnas de 4º de ESO do IES Nº1 da Estrada, titulado A maxia do mar. O segundo premio foi para O amor imposible, do vigués Luis Expósito García e o tercerio para Nara Carballal Nogueira, de Mondoñedo, co relato A destrución da barreira máxica. Ambos os dous galardóns entregranse o 17 de maio en Vilagarcía.