O libro 'Galicia 360' oferta unha ollada única das paisaxes galegas

J. Luis Teófilo, esda., e Cambón

O libro Galicia 360 reúne 98 fotografías panorámicas de gran formato que abranguen 360 grados de visión das paraxes naturais e festas de Galicia. As imaxes saltan da rede ao papel, xa que o libro nace dun proxecto web (www.galicia360.com) do fotógrafo Ricardo Cambón, que permite visitar Galicia grazas á realidade virtual.

Así, Cambón explicou onte na presentación en Santiago que as fotos condensan un traballo de sete anos percorrendo Galicia, estudando as luces e a composición para artellar unha imaxe en torno ao fotógrafo e ao espectador.

O auxe de internet

A técnica da fotografía en 360, "en auxe por mor de internet", combina técnicas fotográficas e de infografía tridimensional, que ten como resultado unha "imaxe diferente, ás veces próxima ao cómic". Deste xeito, permite "descubrir Galicia doutra forma", tal como a ve o propio fotógrafo, coas súas paraxes naturais "impresionantes" e as súas festas, conxeladas co obxectivo de Cambón. "É un diamante agochado, fai falla ensinalo", sinalou.

O volume permite contemplar dende unha perspectiva única espazos como o cabo Fisterra, o Camiño de Santiago en Portomarín, a praia das Catedrais, a muralla de Lugo, a Ribeira Sacra, Cabo Home, a praia da Lanzada, O Cebreiro ou as Illas Cíes.

A editorial, Teófilo Comunicación, afronta este traballo como "un proxecto para Galicia", xa que "dende a empresa privada tamén temos que promocionar o país". Polo de agora saíron do prelo 2.000 exemplares que se distribuirán por Galicia e tamén a Madrid, coa intención de expandirse a outros lugares fóra da comunidade.

O fotógrafo afirmou que é probable que haxa unha segunda parte do libro e que "quizais sería interesante facer un libro protesta das atrocidades" que atopou neses sete anos nas paisaxes galegas.