A primeira tenente de alcalde de Vigo, Carmela Silva, renunciou como deputada pola provincia de Pontevedra ao Congreso para centrarse no seu labor no Concello olívico.

Fontes municipais confirmaron a Europa Press que Silva remitiu unha carta ao secretario de Organización do PSOE, Óscar López, na que comunicaba a súa decisión de renunciar ao Congreso para seguir o seu traballo na política municipal.

Deste modo, a tamén edil de Urbanismo de Vigo cumpre o precepto dun "militante, un cargo" que impide acumular postos, como lle pediron en reiteradas ocasións dende a dirección galega do partido.

De feito, a finais de xuño a Permanente da Comisión Executiva Nacional Galega do PSdeG decidiu instar a dirección do partido a abrir un expediente á concelleira viguesa por incumprir a norma de incompatibilidades defendida polo líder dos socialistas galegos, Pachi Vázquez.

Ademais, non só se propoñía á dirección do partido a apertura dun expediente a Silva por "unha falta moi grave", senón que se esixía á Executiva Federal que tamén estudase unha posible sanción a Silva á vista do seu comportamento.