RSS
As cifras falan e non din cousas boas para a edición en lingua galega. Alomenos ese é o retrato urxente que se extrae da publicación onte do Estudo de Comercio Interior do Libro en España, con datos referidos ao exercicio de 2011, impulsado pola Federación de Gremios de Editores de España e en colaboración co Centro Español de Derechos Reprográficos (CEDRO). Nese informe sinálase que o sector editorial español facturou, durante o ano paso, 2.772 millóns de euros, o que supón un descenso do 4,1 por cento con respeito ao 2010. A tendencia segue a ser a observada desde o ano 2007: as tiraxes redúcense ao tempo que se incrementa o número de títulos editados. O conxunto das editoriais españolas vendeu un total de 119,81 millóns de exemplares, un 12,5% menos que no exercicio anterior, e editaron un total de 83.258 títulos (+4,3%), cunha tiraxe media de 3.441 exemplares (349 exemplares menos de media por título que en 2010). Tomados os datos dos últimos cinco anos, a cifra total de facturación descendeu un 11,2% mentras que o número de exemplares vendidos se reducíu un 20,3%.
