TERROR SOBRENATURAL

‘Auga’, o risco de roubar a un coche

08.06.2008 A curta de ‘Ozo’ foi seleccionada para participar en festivais internacionais como o Neuchâtel suízo ou o Clermont Ferrand francés. O director vigués xoga co suspense até chegar a un final abraiante. “É unha historia sobre a claustrofobia”, di o cineasta que asina o seu segundo traballo despois de case 15 anos no audiovisual

VANESA OLIVEIRA

O director X.A. Perozo, ‘Ozo’ FOTO: Ozo

Tivo a sorte de nacer "o ano adecuado". 1975. O vigués Xosé Antón Perozo Porteiro, en diante ‘Ozo’, somerxíase no mundo laboral cando comezaba a rodarse cine en Galicia. Tan claro tiña que quería traballar no audiovisual que comezou como cámara facendo noticias para unha axencia, e logo dedicou sete anos a traballar como atrecista até que deu o salto á dirección como script e axudante de dirección. Despois de rodar a súa primeira curta en 2004, o thriller Baseado en feitos que puideron ter acontecido, que mereceu o Premio Galicia de Curtas Liceo Casino de Vilagarcía, o seu segundo traballo, Auga, que se estreou en setembro do 2007 en Compostela, acaba de ser seleccionada en festivais internacionais como o Neuchâtel International Fantastic Film Festival de Suíza ou o Clermont Ferrand de Francia.

Un dos principais retos da súa curta Auga é que non ten diálogos. ‘Ozo’ rodou en dúas noites no porto de Sada até 60 planos. "Ao tratarse de meterme no xénero do terror", explica o vigués, "necesitaba rodar moitos planos para que a montaxe tivese ritmo. Sei que facer 60 planos en dúas noites é unha auténtica maratón, é pasarse un pouco, pero tiven a sorte de que tiven un equipo moi competente."

De feito, ao carecer de diálogos, a música de Manuel Riveiro e a interpretación de David Perdomo e Marcos PTT Carballido son as bases sobre as que se sustenta o filme. "Para min, Marcos PTT é unha das grandes promesas do cine galego. Poucos actores teñen unha formación tan variada coma el. En ‘Auga’ aguantou unha noite enteira saíndo e entrando da auga do mar", di ‘Ozo’.

Na curta, dous ladróns intentan roubar no interior dun vello Seat Ibiza aparcado nun peirao ao ver dentro del un billete de 100 euros. Pero non lles vai resultar fácil, xa que o coche sabe defenderse... Baseada en La cabina dirixida por Antonio Mercero e protagonizada por José Luis López Vázquez que para ‘Ozo’ representa "unha crítica social da xente que non lle bota unha man ao que o necesita".

'Auga' é unha "historia sobre a claustrofobia", apunta o director que quixo facer unha curta en diálogos para "practicar a dirección de actores". De feito, carecer de diálogos resultou ser un aliciente para que a curta poida participar en festivais internacionais. Ao seu ver, en Galicia, "estamos nun momento de ebulición de festivais. Case todos os meses hai un festival de curtas pero isto non quere dicir que todo o que faga curtas en Galicia teña difusión. Tamén é unha axuda o programa da TVG e tamén axuda internet e YouTube onde a distribución é case infinita, xa que o que funcionan son as historias".

‘Ozo’ viviu en primeira persoa a evolución do audiovisual en Galicia. Coida que os principais cambios que se produciron foron a nivel de formación. "Na segunda metade dos 90, cando se comezan a rodar longas, viñan moitos profesionais de Madrid ou Barcelona, que foron ensinándonos aos galegos os diferentes roles dun filme. En menos de dez anos, conseguiuse ter un número de técnicos e actores galegos que profesionalizaron o sector", apunta.