Novoneyra para o Día das Letras

Uxío Novoneyra naceu en Parada de Moreda no ano 1930

No noveno aniversario do pasamento de Uxío Novoneyra, que se cumpriu o pasado día 30, os amigos do poeta do Courel seguen a reivindicar a través da web www.uxionovoneyra.com que se lle dedique o 17 de maio do 2010.

Unha reivindicación que se xustifica en que a Real Academia Galega (RAG) marca que esta data simbólica só se lle pode dedicar a un escritor que polo menos falecera hai dez anos.

Os impulsores da candidatura do autor de Os Eidos, xa reuniron no seu portal de internet o apoio de máis de 650 persoas que destacan o valor humanista e literario de Novoneyra. Unha vox populi enviada como un búmerang á RAG que o ano vindeiro recoñecerá o 17 de maio a Ramón Piñeiro.

Os apoios chegan dende todas partes de Galicia pero tamén de 55 países de todo o mundo como México, Portugal, Arxentina, Francia, Estados Unidos, Brasil, Colombia, Reino Unido ou Venezuela. Voces que destacan como a do arxentino Juan Gelman e xa deitaron palabras de recoñecemento á candidatura do poeta do Courel, nado en Parada
de Moreda no ano 1930.

Fillo de labregos, anovador da visión da paisaxe na literatura galega, no 55 deu ao prelo o seu poemario máis mítico, Os eidos, obra de referencia para os mozos da época, que continuará até os anos oitenta con diferentes volumes.

Preside até a súa morte, no ano 1999, a Asociación de Escritores en Lingua Galega logo de fixar a súa residencia en Santiago de Compostela no 1983. Os seus libros abranguerán diferentes temáticas como a amorosa en Muller pra lonxe (1987), ou a política en Do Courel a Compostela (1956-1986).

O seu compromiso nacionalista e marxista aúnase á súa preocupación pola linguaxe poética e, en especial, polo efecto sonoro dos seus textos.

Definido por Méndez Ferrín como o "poeta nacional de Galicia", os amigos de Uxío Novoneyra destacaban o seu carácter afable e sinxelo, así como o seu gusto por recitar os seus versos en público.