O pintor Antón Lamazares que fará unha exposición no Play-Doc deste ano

A sexta edición do festival Play-Doc, que se celebra no concello de Tui arrinca hoxe cun total de 31 filmes documentais, divididos nas catogorías de longametraxes, cortos e traballos feitos en Galicia integrarán o programa desta nova edición. Os filmes documentais participantes foron seleccionados entre os máis de 800 recibidos procedentes dos lugares máis diversos do mundo. O Play-Doc, que repartirá 9.000 euros en premios, consolidouse nos últimos anos no calendario internacional de certames dedicados ao xénero documental de autor e suscita o interese de profesionais e afeccionados de España e Europa.

Na súa sección informativa o festival presentará dúas importantes retrospectivas dedicadas a dous realizadores de recoñecido prestixio internacional, neste caso o francés Raymond Depardon e o norteamericano Jay R­osenblatt. Este último a medio camiño entre o found footage e o experimental, acadou numerosos premios en festivais como Sundance. A retrospectiva de 9 pezas que lle dedica o festival permite coñecer un autor de ollada única, tan conciso como evocador. No caso de Depardon, chega a Tui logo de fundar a comprometida axencia Gamma, terse erixido como un dos máis grandes fotógrafos da Magnum, e contar na súa traxectoria con filmes tan imprescindibles como San Clemente ou Faits divers, que se poderán ver en Tui. O festival ponse en marcha hoxe coa estrea de Horizonte sin dueño, unha cinta na que o pintor lalinense Antón Lamazares fala da orixe dos impulsos creativos. Neste documental inclúense conversacións do artista Lamazares con amigos, familiares e outros artistas. Fiel á súa identidade, o Play-Doc introduce dúas exposicións de pintura e escultura dos artistas galegos Antón lamazares e Manolo Paz e tamén destaca a presenza dos creadores da web francesa La Blogotheque, unha das propostas audiovisuais máis interesantes que se poden atopar na rede. Como actividade paralela destaca a presenza da banda americana The Spinto Band, o sábado na sala Metropol, no que será o seu único concerto en España, unha oferta que se completará co directo ofrecido o día 19 por Batida, unha banda con músicos africanos procedentes de Luanda e Angola, que combinan música tradicional con sons eléctricos.