O venres día 8 ía eu de paseo polo Cantón cando vin unha xente cantando e parecía que bailando ao son da gaita. De repente, escoitouse "na Galiza en galego" a berros, e xa me dei conta de que os tiros non ían por unha actividade cultural na rúa. A unha distancia prudente, as furgonas da Policía Nacional. Ao día seguinte souben do que pasara: un grupo de fulanos foille rebentar unha manifestación a outros deste xeito teoricamente tan lúdico.

¿Dende cando as gaitas serveron para esmagar os dereitos dos outros? Por moi inocente que parecera a forma, o caso é que foron impedirlle o dereito a un grupo de persoas que -polo que dicía a prensa- tiñan permiso de manifestación. Calquera limitación dun dereito constitucional prodúceme noxo, pero neste caso, utilizar unha manifestación cultural galega para facelo produciume noxo e vergonza.