Fai uns días chegou o meu poder unha presentación de Power­Point, que trataba de facerme ver a utilidade do galego no mundo actual. Pois si, efectivamente o galego serve para entendernos con moita xente, pero tamén para o mesmo serve o castelán. Non deixemos que nos pechen os ollos os que queren unha certa cota de poder co gallo do galego. Eu son galego, afortunadamente falo galego, castelán e inglés, e non quero que os meus fillos queden presos dunha educación que lles limite as posibilidades de aprendizaxe do castelán. Por outra parte, teríamos que dicir que as linguas non se impoñen, as linguas fálanse... e cando o pobo se cansa de usalas van desaparecendo e incluso morren. ¿Temos entón que recuperar o latín, ou o grego? Estas linguas tiveron a súa época de esplendor, e chegou un momento que as diferentes sociedades que as usaban descartáronas por outras como o galego, o castelán, o portugués, o catalán, o francés... As linguas están vivas; non se parece en nada o actual galego co orixinal galaico-portugués, nin o actual castelán co seu predecesor.

Quen sabe si a causa do desenvolvemento tecnolóxico dentro de dous séculos segue existindo o castelán? Se a sociedade decide deixar de empregalo, nada nin ninguén poderá evitalo (xa pasou antes co latín).

Que non nos enganen! Estou orgulloso de falar galego, estou orgulloso de ser galego (o que significa que tamén estou orgulloso de ser español), pero quero que os meus fillos dominen tanto o galego como o castelán.

Quen sabe se o día de mañá terán que emigrar a un país de fala hispana?