Ao Sr. Óscar Fernández: no apartado de Cartas as Director deste mesmo xornal, o día 02/03/2010, lin a súa opinión sobre o Concurso de Pulpeir@s. Certamente sorprendeume moito a súa acusación de tongo, como vostede mesmo cualificou. Na miña opinión, o polbo á feira é un prato que se identifica plenamente coa nosa Galicia. Coido que non fan falla "científicos cefalopeiros", para degustar e cualificar un prato de polbo. Asi mesmo, penso que os conceptos de "corte, aliño e punto de cochura"son fundamentais para a cualificación do dito prato, e calquera de nós, xente da rúa, poderiamos ter a nosa propia opinión sobre eles. ¿Precísase para iso ser gastrónomo, cociñeiro ou ter un nivel intelectual específico? Do mesmo xeito, penso que o polbo á feira está presente nas romarías de maiores dos tempos de Franco, na época da transición, hoxe mesmo, e estará ó longo de tempo, é simplemente unha cuestión de sentido c­omún.

Tampouco entendo os seus comentarios sobre o viño albariño, as rosquillas e os Tonechos.Todos estes conceptos antóllaseme enxebres, perfectamente asociables a un prato de polbo. Teño que dicir que tiven a sorte de probar, en varias ocasións, o prato elaborado pola señora que levou o primeiro premio, en todas elas resultoume exquisito.

Estou seguro de que tamén teño catado o que prepararon algúns dos outros participantes, pero isto non podo afirmalo por descoñecer a súa identidade, fixo que todos eles estaban tamén moi ricos.

Na miña opinión a súas acusacións son bastante graves, e se vostede cre que ten argumentos sostibles para demostralas, debería facer algo máis que enviar unha carta a un xornal.

Despois de ler a súa exposición, non podo deixar de sentirme decepcionado, pois coido que tanto o polbo, o albariño como as rosquillas son todos eles produtos plenamente integrados no folclore do noso país, ¿cecais tamén os Tonechos? Semelloume que vostede os tomaba en tono despectivo.

Este é simplemente o meu xeito de pensar, aínda a risco de que me cualifiquen de "galego no sentido pexorativo da palabra".