Margarita Ledo Andión

É única, con mil caras e todas mirando cara á cultura. Directora de cine, escritora, catedrática e profesora universitaria, Margarita Ledo Andión converteuse na quinta muller membro da Real Academia Galega. Ante un auditorio de máis de 200 persoas entre académicos, familiares e personalidades da cultura que foron testemuñas do seu nomeamento, Ledo avogou, instou e esixiu no seu discurso -Do bucle e da fenda- encontrar a imaxe que represente a Galicia moderna e almacenar no pasado as esgazadoras instantáneas do fotógrafo Manuel Ferrol sobre o drama da emigración, que durante tantas décadas representaron Galicia ante o mundo. Margarita Ledo propugnouse, xunto coas súas compañeiras académicas, para proporcionar unha visión distinta, complementaria e enriquecida da cultura galega. A catedrática lucense demostrou ao longo da súa carreira, e onte co seu soberbio discurso, a súa valía e coñecementos imprescindibles para a Real Academia Galega, para Galicia e para a cultura deste gran país. ¡Grazas pola túa contribución e por todo o teu saber!