Leva razón Alfonso Guerra cando di que a ministra de Igualdade está facéndonos perder o tempo coa proposta de incorporar o palabro membra ao dicionario da Real Academia Española. Até podemos intuír que o vello dirixente dos socialistos e das socialistas españois e españolas se vai decatando de que a ministra ten moi pouquiño que aportar e que parece como se houbese moitos ministros e moitas ministras de máis no novo gabinete e na nova gabineta.

Estas cousas e estes cousos pasan sobre todo cando os discursos e as discursas son moi rudimentarios e rudimentarias e por iso este vaivén e esta vaiveña serve para un roto como para un descosido, tanto como para unha rota como para unha descosida. E así se entende que o Vicepresidente nacionalista da Xunta, como di poucas ideas e poucos ideos con substancia e con substancio case sempre, pois que as mande dirixidas e dirixidos, sen falto e sen falta, unha e mil veces e vezas, aos amigos, ás amigas, aos compañeiros e ás compañeiras, até que todo fica niso, en nado e en nada. Pelillos al mar e a la mar.

Eu non sei se en Andaina estarán de acordo con esas propostas, pero estráñame. Andaina é unha asociación feminista moi seria que cumpriu agora vinte e cinco anos e acaban de celebralo cunha fermosa edición antolóxica da revista, na que se pode ver, ler, o tremendo esforzo do movemento feminista galego desde a negrura franquista deica agora. Cando por exemplo tiñan que explicar entre burlas e insultos, que unha violación non é unha heroicidade masculina; cando os xuíces sentenciaban pensando aínda no dereito de pernada, dito sen esaxerar.

Moitos historiadores afirman que a única conquista con resultados durante o século vinte en todo o mundo é a da muller. Ninguén o podería sospeitar hai trinta anos. Daquela criamos que a igualdade económica sería a grande achega desta época. A nós gústannos moito as mulleres de Andaina, porque manteñen posturas serias, firmes e contracorrente, porque abren camiño desde o lugar menos vistoso, que é o da análise e o das propostas sen conto, no espazo da sociedade civil, da que se fala menos canto máis engordan os cus.