Hai un par de veráns apareceu no mercado unha destas cancións horrorosas que facía que as persoas sensatas apagaran o radio cada vez que sonaba. Despois do Papichulo, posiblemente era a peor canción da historia da música mundial, e para que se fagan unha idea, era mil veces peor que a versión coral do Chiki Chiki.

Escoitala daba incluso algo de vergoña, e nos bares que se atrevían a poñela, só aqueles que beberan unhas cantas copas de máis podían aguantar o seu ritmo. Meu irmán cometeu o erro de non cambiar de canle un día que a puxeron nun especial de verán na tele, e dende entón a ten metida na cabeza. De cando en vez, como nas peores historias de terror, aínda a canta sen darse conta.

Non sei se coñecen aquela canción que ata hoxe carecía de sentido. Chamábase La Gasolina, e dicía algo tan coherente como "me gusta la gasolina, dame más gasolina" e o repetía unhas mil veces. Quen lle iba a dicir a eses horteras, "antirítmicos", molestos e pesados, que cos anos acabarían por ter razón, e que a súa canción serviría para describir unha situación social tan estrana como a que estamos a vivir. Isto si que demostra que estamos en crise. "Me gusta la gasolina, dame más gasolina....".