Malós é o nome familiar de María Dolores Cabrera (a compañeira de Víctor Freixanes). É posiblemente a persoa que máis coñece de libros, movementos literarios e editores galegos, e sobre o tema leva publicado diversos traballos, entre eles un libro de consulta imprescindible, publicado pola Xunta hai algúns anos. Pero ela fai como a troita. E vou coa anécdota: nunha asemblea que tivemos hai tempo na Unión de Escritores de Cuba, da que son o único membro estranxeiro vivo (fórono tamén Francisco Mota e Mario Benedetti), alguén dixo que a galiña pon un ovo e cacaréxao, e a troita pon vinte mil e sigue caladiña. Malós traballa e cala. Non alardea. Recórdoa en 2008, durante a Feira Internacional do Libro da Habana, curioseando, indo e vindo polas vellas librarías da rúa Obispo, e chegando triunfante ó hotel cun exemplar de Cuando Che era Ernestito, de Anisia Miranda, publicado hai moito tempo. Hai dous anos que a Real Academia Galega lle dedicou o Día das Letras a Xosé María Álvarez Blázquez. E coincidindo con esa merecida homenaxe ó poeta, narrador, arqueólogo, libreiro e editor tudense-vigués, galeguista por vocación e por familia, Malós publicou un breve libro, moi esclarecedor, sobre a traxectoria de Xosé María. Un aporte rigoroso, que titulou Xosé María Álvarez Blázquez, ourive de libros, que nos ofrece co formato daquela popular colección O Moucho, creada polo editor na Editorial Castrelos, na que deu a coñecer nada menos que 64 títulos. En só 82 páxinas temos diante abondosa e moi ben exposta información sobre a liña vital e creativa deste traballador exemplar, "dono das palabras, descubridor de tesouros e mestre da vida" que tan boa lembranza nos deixou ós que fomos seus amigos.

Noraboa a Malós por este estupendo traballo e que siga, coa súa curiosidade e coa lucidez que a caracteriza, informándonos sobre a evolución do libro galego e sobre os nomes clave da nosa cultura.