O DETERIORO da democracia en España fai que apenas exista xa división entre poder lexislativo, executivo e xudicial. Os partidos do poder conforman un duopolio corrupto nas institucións do estado, que compón e descompón tamén nos órganos da xustiza. Non representan os cidadáns, senón que actúan como executores do poder financeiro. Abonda con algúns exemplos do PSOE, por non falar xa do PP: Carme Chacón e Trinidad Jiménez por exemplo, eran membros hai un par de anos da Comisión Trilateral, un suprapoder de Occidente, onde se coordenan as macropolíticas a aplicar. Zapatero asistía ás últimas reunións de Bilderberg, unha estrutura semellante.

Mantense a ficción dun grande antagonismo entre o PP e o PSOE para o "teatrino" colectivo (tipo Barça-Real Madrid) e no entanto as medidas para o saqueo do estado de benestar en Europa non indican grandes diferenzas entre a tendencia conservadora e a socialdemócrata. En calquera caso "os políticos non gobernan o mundo, Goldman Sachs goberna o mundo", proclamaba aquel abutre de Wall Street que profetizou na BBC o afundimento do euro.

O terceiro pé para o saqueo é a prensa, os propietarios da liberdade de expresión mellor dito, porque esta liberdade está privatizada, ten donos. É dicir, os que lle poñen guión á ficción do "teatrino", e que son os propietarios das finanzas. El País por exemplo é de Liberty Acquisition, participado entre outros por... Goldman Sachs. E o Banco de Santander.

www.sarille.eu