Ter Internet en todo Santiago, gratis, e cunha alta velocidade, sería perfecto. Pero como todo xunto non pode ser, teremos que ceder e aceptar certas variacións das nosas esixencias.

Poderiamos aceptar que fora gratis, que chegara a todos os recunchos de Santiago, pero lentiño. Tamén serviría que fora moi rápido, en todo Santiago, e pagando. Tamén habería quen -dependendo da súa residencia- aceptara que fora gratis e rápido, pero que só funcionara nalgún barrio da cidade.

O que non é noticia é que a nova rede Wimax da capital sexa lenta, non sexa gratis, e por riba só funcione na zona vella, onde por certo, non se concentra precisamente o groso da poboación compostelá, e onde existen outras opcións máis atractivas.

Por estas cousas é polas que Santiago é unha cidade case moderna. Porque case ten AVE, case ten boas comunicacións, porque case conta cun transporte público que teña contento a case todo o mundo, case traballa polo deporte e os deportistas, case ten un ensanche práctico e bonito, e agora tamén, porque case ten Internet gratis na praza Roxa e na estación de tren. Así, case imos ben.