Un compañeiro meu explicoume como vía el a situación política española. Confesoume que cando Fraga Iribarne se presentara por primeira vez ás eleccións galegas, el votárao. Díxomo para que vise que non é un home dogmático en nada e para facerme comprender por que é necesario parar á dereita nas próximas eleccións. Está espantado coa política do PP, unha política baseada na mitoloxía, segundo o seu criterio. Explicoumo e coincido.

Os populares esqueceron durante estes catro anos os problemas reais e fabularon unha fin do mundo da nación española. Se os navarros esixían un referendo para crear a unión con Euskadi, tal como admite a Constitución e a lei foral, estabamos ante a disolución de España. En caso de negociar o goberno con ETA, tamén. Se os cataláns aprobaban o estatuto, igual. O mito da unidade da patria a todo vapor. E ao revés. Se o goberno non se sometía á hexemonía dos Estados Unidos, España convertíase nun país débil, o cal é un curioso paradoxo á hora de analizar a soberanía e a fortaleza que eles tanto din que arelan. A familia disólvese, os crimes do aborto e os matrimonios homosexuais acaban coa moralidade e por tanto a España católica destrúese. E entón desenfundan o outro mito, o da España gardiana das esencias morais.

Estas ladaíñas van metidas a pao seco, sen acompañante ningún, sen poñer os pés na terra, sen falar de resolver os problemas da sociedade. Só a evocación das esencias nacionais.

O problema de facer oposición mitolóxica é que non hai resposta. Elimínase a posibilidade de usar a razón pública. Se consideran que se aniquila España e que se asasina un neno con cada aborto, a única posibilidade, ante tanta perversidade é só a de usaren a forza. Detrás destes recursos míticos sempre se atopa a forza, e nunca a razón. Sen querer comparar o incomparábel, o outro día lin que até 1924, Mussolini declaraba que o fascismo baseábase na razón.. Despois non foi así. O meu compañeiro desexa que haxa outra dereita, que se funde no pacto social e para iso cre que necesita unha verdadeira travesía do deserto e está disposto a votar para que esa peregrinación se produza.