Hai poucos días no telexornal da noite de Antena 3 entrevistaron a David Pur, que -aos seus 115 anos- e é o home máis vello do mundo. Pur vive nun centro de maiores en Israel e asegura que "o meu segredo é evitar os celos e o mal humor, que acurtan a vida". Nado en Persia en 1895, afirma que a súa fórmula é "a ledicia e o optimismo: o segredo da longa vida é tomar todo con calma". A súa estirpe é bastante extensa, pois ten nove fillos -dos que viven tres-, 18 netos e 56 bisnetos. Non come carne nin fritos, comeza o día con froitos secos, sabe a Biblia de memoria e conta chistes. Fumou ata os 106 anos sen tragar o fume e ata hai pouco tomaba un vasiño de augardente ao levantarse.

A lonxevidade de Pur pode deberse a non tomar fritos e non tragar o fume do cigarro, ben o seu carácter alegre e optimista ou ben a ambas cousas á vez. O seu fillo Salim -de 70 anos- di admirar ao seu pai porque "é un ser positivo". Superar os cen anos non significa ter tido unha vida feliz necesariamente. Pero aprender a "evitar o mal humor e ser positivo" compensa sempre, con independenza dos anos que se vivan.