Aos catro anos de suscribiren a Fundación Rosalía de Castro e a Câmara Municipal de Vila Nova de Famalicão (Casa de Camilo-Museu. Centro de Estudos) un acordo de colaboración e de teren celebrado na Casa de Rosalía o Día Mundial da Poesía, o Camilo fixo unha segunda viaxe a Galicia este 16 de marzo, no seu 185 aniversario. Viña interpretado por Reinaldo Ferreira, que narrou para os 90 alumnos e alumnas da Universidade Senior da cidade, a primera chegada a Galicia en viaxe mariña cun temporal que os desviara a Vigo.

A primeira celebración foi do soneto, en homenaxe á vila na que se editou, entre 1929 e 1933, a revista O soneto neolatino, que publicou 192 en linguas románicas, entre eles nove de Ramón Otero Pedrayo, Aquilino Iglesia Alvariño e Antón Noriega Varela. Na segunda, ademais da actuación do Camilo, houbo un recital de poemas en ambas linguas e o coro da institución fíxolle a Rosalía ofrenda dunha selección do cancioneiro popular. Esta irmandade abarcará dentro de pouco as Casas-Museo doutros dous grandes da literatura europea: Charles Dickens (Londres) e Victor Hugo (París). Rosalía, como Camilo, foron narradores dun mundo que podemos recoñecer aínda para nos mergullarmos na súa esencia e percibir as súas emocións, as súas alegrías -poucas- e as súas tristezas -moitas-. Mais, se Camilo destaca na súa obra como gran narrador, Rosalía sobresae no mundo literario como poeta. Cantares gallegos (1863) é a obra auroral da literatura galega contemporánea, feita apoloxía e antídodo contra o veleno da falta de estima propia e allea que Galicia tiña no seu tempo. Follas Novas (1880) é, a dicir de moitos estudosos, a obra cume da poesía rosaliana. En las orillas del Sar (1884), que pode considerarse a continuación e desenvolvemento da parte lírica de Follas Novas, é unha obra mestra da poesía en castelán do século XIX.

Rosalía de Castro e Camilo Castelo Branco, irmáns no sentimendo da dor creativa, soberanos escritores nas súas linguas, encarnacións do mellor dos seus respectivos pobos e venerados por eles, déronse simbolicamente a man para celebraren connosco un fraternal encontro encontro literario no nacemento da primavera. A Fundación Rosalía de Castro celebrará outro acto no marco do Día Mundial da Poesía/ World Poetry Day, de carácter público, o día 23 de marzo.