FEIJÓO principiou a súa cativa xestión vulnerando a doutrina Madison, principio xurídico que obriga aos Gobernos a asumir as consecuencias do legalmente acordado polos Gobernos anteriores. Porque a derrogación da adxudicación eólica do 2008 impediu aproveitar as circunstancias existentes para desenvolver a produción eólica adxudicada. As resultas deste despropósito (que nos fixo descer a moi baixos níveis de seguranza xurídica ) agraváronse coa incompetencia da Xunta para levar adiante unha segunda adxudicación eólica. En último de contas, a non execución dos plans industriais asociados privounos de 5000 M€ deinvestimentos perdidos (1800 € /galego) e de milleiros de postos de traballo que contribuirían amortecer non pouco na Galicia a rigorosidade desta terríbel crise.
Mais os Gobernos do Estado agravaron esta política enerxética errática. Os socialistas limitaron as primas para a produción a partires das enerxías renovábeis e o actual Goberno suprimiu as súas primas de produción , mesmo con carácter retroactivo. “The Wall St Journal” ven de dicir que moitas compañías USA limitan a súa actividade produtora de enerxía na España por mór da inseguranza xurídica. Inseguranza que o Presidente de Isolux-Corvian ven de alcumar de “terceiromundista” .
Como publicaba hai días EL CORREO GALLEGO Galicia segue a asumir grandes custos ambientais para lle exportar enerxía a dous millóns de familias españolas e portuguesas, mentres o Goberno do Estado pexa o consumo galego incrementando as nosas facturas co custo dos tributos eólico e hidráulico. Pagamos a enerxía máis cara a pesares de producila ao noso carón. E cando os nosos esforzos pasados facían albiscar un sector galego de enerxías renovábeis industrial e tecnolóxicamente desenvolvido, os sucesivos erros dunha política enerxética lesiva e bananeira destragaron ese proceso.
Mentres a cidadanía deste País non o solucione, seguiremos a sofrir os prexuizos e a non participar dos beneficios.