Ao chegar este tempo non é raro ver un camión ou unha furgoneta na beiravía dalgunha estrada galega cargado con produtos de temporada para vendérllelos á xente que pasa. Estes postos de venda ambulantes adoitan estar atendidos por homes, xa algo entrados en anos, que procuran para os seus produtos unha rendibilidade que o mercado non lles dá. Iso obrígaos moitas veces a ter que durmir dentro dos camións e a comer o que traen da casa. Agora o que máis se ve son cereixas do Bierzo que se poden mercar nas proximidades de Ponferrada ou Vilafranca indo pola nacional, da mesma maneira que se ofrecen os grelos entre Ordes e Sigüeiro ou os pementos de Herbón no campo da feira de Padrón e nos arredores, sobre todo no pequeno trozo que une a vila coa veciña de Pontecesures. Cómpre reparar en que as bolsas sexan de Pimerbón co seu número identificativo, que fomos invadidos como nunca por imitacións. Logo veñen patacas, melóns, sandías, cebolas, allos...

O domingo pasado había xente arredor dunha furgoneta. En apenas dous minutos pararon seis coches. Non vendían nada, tratábase dun pai que repartía os bocadillos da merenda aos fillos e aos seus amigos que foran de excursión.