Opopular cantautor cubano Pablo Milanés dixo que a música tradicional de Venezuela é a máis rica de Latinoamérica. Coenteillo na Habana a Farruco Sesto, poeta galego-venezolano (ministro de Cultura do goberno de Hugo Chávez) e ratificoumo, ó tempo que me obsequiaba un álbum con catro discos que conteñen 39 cancións con letra del, musicadas e cantadas por Xulio Formoso.

Vaian por diante estes datos para referirme a seguido ó Sistema Nacional de Orquestras Xuvenís e Infantís de Venezuela, laureado en 2008 co Premio Príncipe de Asturias.

O proxecto comprende 120 orquestras xuvenís e 60 infantís e ten como finalidade que os estudantes de música poidan poñer en práctica os seus coñecementos. A Orquestra Sinfónica Nacional Xuvenil chegou a actuar no Kennedy Center de Washngton, e na sede das Nacións Unidas, e ante o papa Xoán Paulo II, e chegou a ter como directores e figuras de prestixio como Zubin Mehta, Simon Ratle, o sueco Gustavo Dudamel e o mestre Eduardo Mata, que tiveron ocasión de tocar con Plácido Domingo, Alicia de Larrocha, Caballé...

Esta organización conta, ademais, con talleres para nenos e xoves, nos que se reparan instrumentos e leva a cabo programas especiais para repaces discapacitados. Ten unha coral de nenos xordos; préstalles asistencia ós colexios públicos que desexen integrarse no sistema musical.

Dirixe esta singular organización José Antonio Abreu (Trujillo, Venezuela, 1939) director titular da Orquestra Sinfónica Simón Bolívar, dende a que creou un grupo musical con mozos e mozas de todo o país. Así comezou todo. Aquel experimento foi o xermolo da obra que hoxe admiramos.

O mestre Abreu recibiu diversos premios internacionais. Foi designado Embaixador de boa vontade para a música e a paz, e enconmendáronlle promover no mundo enteiro este sistema musical venezolano.