Imaxe da presentación da segunda edición do Fórum Cicerón FOTO: Qcoach

Os días 11,12 e 13 de abril o Concello de As Pontes acollerá a segunda edición do "Fórum Cicerón, se busca talento", cuxo obxectivo é botarlle unha man ós universitarios galegos para que poidan ser contratados. En Radio Obradoiro, o coordinador do fórum explicaba que "en Galicia temos talentos extraordinarios, ós que hai que axudar a atopar un traballo, sobre todo nestes difíciles momentos".

Tal e como sinalaba Joaquín Dosil, o fórum ten un doble vertente: "a formativa, que lles permite ós estudantes poder traballar e formarse en distintas competencias transversais, e a empresarial, xa que as firmas presentes poderán ver como os universitarios van competindo entre sí e chegar a contratalos". O resultado da primeira edición foi francamente bo, xa que "o 50 por cento dos estudantes acabaron traballando".

O Fórum Cicerón está dirixido a alumnos de último ano de carreira, ou que se licenciaran no curso 2010-2011. Os interesados en participar poden atopar tódolos datos en www.sebuscatalento.es. Dosil sinalaba que o que teñen que facer é enviar o seu expediente académico, o currículum e unha carta de presentación. O prazo de recepción está aberto e remata o 23 de marzo.

O coordinador do Fórum Cicerón insistiu en que o que máis se vai valorar "é que ese alumno tivera durante a súa vida outros intereses, como por exemplo traballar durante o verán como camareiro ou nunha discoteca". O ano pasado recibiron 265 currículos, dos que chegaron ó final 32. Tamén serán 32 os que se van seleccionar nesta segunda edición, na que se espera recibir entre 350 e 400 solicitudes.

Preguntado polas carreiras que poderían ter unha mellor saída, Dosil apuntou que iso é algo que "van marcar as empresas. O ano pasado tiveron máis opcións Empresariais e as enxeñarías".