El Correo Gallego

Portada  |   RSS - Portada RSS

VOLVE A POLÉMICA

O PSdeG acepta a dobre toponimia da Coruña "se ten consenso" e critica o PP por "abrir un debate de hai 20 anos"

Vázquez recorda que a Lei de Toponimia é do PP e cre que se hai un debate sobre esta cuestión, debe analizalo o pleno municipal

EUROPA PRESS. SANTIAGO  | 28.09.2009 
A- A+

O secretario xeral do PSdeG, Manuel Vázquez, mostrouse hoxe partidario de aceptar a dobre toponimia da Coruña no caso de que esta goce do "consenso" da sociedade a través do pleno do concello e, tras isto, criticou o PP por "reabrir un debate de hai 20 anos".

De feito, en rolda de prensa en Santiago, recordou que a Lei de Toponimia de Galicia, que establece que a única nomenclatura oficial é a galega, foi redactada pola anterior Xunta, liderada polo PPdeG, polo cal "o topónimo actual púxoo o PP".

Así se pronunciou o xefe de filas do PSdeG en relación ás declaracións do alcalde da Coruña, o socialista Javier Losada, quen mostrou, nunha entrevista co diario 'El País', o seu desexo de "legalizar" o topónimo castelán da cidade. No entanto, sinalou que quen puxo este asunto sobre a mesa foi o voceiro popular no concello coruñés, Carlos Negreira, "con evidente desautorización" por parte do seu partido.

Convencido de que calquera cambio sobre o topónimo "debería ser froito dun consenso cidadán e non dun debate artificial", asegurou que o seu partido non tería "ningún problema" en aceptar o nome en castelán, posto que Galicia ten "dúas linguas oficiais". "Ter os topónimos en ambas sería unha cousa absolutamente normal", resolveu.

"O PSdeG nunca tivo problemas coa lingua", insistiu Vázquez, á vez que considerou que "quen si os ten" é o presidente da Xunta, Alberto Núñez Feijóo, posto que o PP é o que "abre sempre os melóns lingísticos". En todo caso, minimizou a cuestión porque "o maior problema" da cidade herculina "non é chamarse dunha forma ou outra".

"A nós non nos xera ningún tipo de problema", reiterou, á vez que asegurou "entender" a postura do BNG -remiso a castelanizar o topónimo- e do PP -proclive a legalizar as dúas formas-. "Nós cremos que temos dous topónimos", resolveu Vázquez, para apostar por "buscar o consenso nun país bilingüe".

De todos os xeitos, considerou que deben ser os cidadáns da Coruña, a través dos seus representantes políticos, os que se deben pór de acordo sobre este asunto para "decidilo e expolo oficialmente".

A maiores, preguntado sobre se unha posible reforma no topónimo da cidade herculina derivaría nunha modificación da lei ou nun caso concreto da mesma, evidenciou que foi o PP o que oficializou o topónimo A Coruña, polo cal defendeu que debe ser este partido o que explique "como facer unha nova formulación".

"Galicia non ten o debate aberto, se A Coruña o quere abrir, que o abra", opinou Manuel Vázquez, quen apuntou posteriormente que a cidade herculina conta "cunha vía" para facelo.

No entanto, considerou "moi sorprendente" a reapertura dun debate "que estaba pechado" e que, en calquera caso, non ten, a xuízo do líder dos socialistas galegos, "a máis mínima transcendencia".