Compostela Aberta insta a facer un censo de represaliados do franquismo
O obxectivo desta iniciativa é "recuperar a memoria democrática" e debe contar a idea cunha "liña de financiamento"
O grupo provincial de Compostela Aberta presentará unha moción no pleno da Deputación da Coruña deste venres na que insta á institución a elaborar un censo para localizar, identificar e exhumar ás vítimas do franquismo que aínda están en fosas comúns.
O obxectivo desta iniciativa é "recuperar a memoria democrática" trala Lei de Memoria Histórica, que o grupo pensa que non conta co respaldo das diferentes administracións.
Agarda Compostela Aberta, se esta moción sae adiante, que a Deputación elabore un censo de persoas vítimas de desaparición forzosa durante a Guerra Civil e o franquismo e a partir daí que se presente un mapa cos lugares onde poderían estar enterrados.
Busca o segundo punto da iniciativa que se poña en marcha un protocolo de actuación para a exhumación dos corpos e que se identifiquen os restos mortais para que poidan ser enterrados en condicións dignas.
Debe contar a idea cunha "liña de financiamento", un protocolo de dignificación de fosas comúns e cemiterios municipais e a Deputación instará á Xunta de Galicia e ao Goberno central a tomar medidas similares, informa Compostela Aberta a través dun comunicado.