O roteiro de restaurantes desafía a crise coa estrea do Porta Faxeira

Porta Faxeira, que acaba de abrir na rúa do Franco 50, basea a súa carta nos produtos galegos FOTO: Ramón Escuredo

Ninguén dubida de que a gastronomía galega está de moda. Por fin chegou a hora de facerlles xustiza á sabiduría daquelas avoas que ían transmitindo de xeración en xeración os seus segredos entre fogóns. Detrás da tradición que atesouraba cada fogar había (e hai) un patrimonio único: a inmellorable calidade do que sae da horta e o luxo que acubillan as rías, sen esquecer a excelencia do gando que se cría nos pastos autóctonos. Bebendo do bo facer dos antergos e botando man dos produtos galegos acaba de estrearse o restaurante Porta Faxeira. Baixo o paraugas de Pousadas de Compostela, o local segue fiel á filosofía do grupo: dotar de personalidade propia espazos históricos en desuso. Hoteis como o Virxe da Cerca, Pombal, San Clemente ou A­iras Nunes, entre outros, non son máis que un exemplo do espírito que marca a súa folla de ruta.

O establecemento acabado de inaugurar coroa a saída da rúa do Franco FOTO: R.Escuredo

A súa última aposta chega en forma de restaurante. Situado na emblemática rúa do Franco 50, Porta Faxeira arrinca con dous fichaxes estrela, conta a este diario o director-xerente de Pousadas de Compostela, José Manuel Otero. O chef Daniel Novo e o maître Roberto Guerra (polo de agora ligados ó Pazo de Lestrove, outro establecemento do grupo) encabezan o equipo dun local con capacidade para 200 comensais. Como non podía ser doutro xeito, os auténticos protagonistas da cociña serán as carnes con selo galego e os produtos frescos da Praza de Abastos de Santiago. Sempre a "prezos asequibles", apontoa José Manuel Otero. De cara ó verán, o espazo terá xa lista unha terraza de 300 m2 coroada por un magnolio centenario.

Outro local para xullo

A estrea do Porta Faxeira vén dar pulo a un roteiro que cada vez conta con máis incondicionais: o dos restaurantes. Pese ó castigo dunha crise que apenas concede indultos, hai propostas que logran saír a flote coa cabeza ben alta. ¿O segredo? "O noso principal patrimonio é o equipo humano", aclara Otero mentres lembra o Garfo de Ouro que no 2009 avalaba a xestión do Pazo de Lestrove. Aínda que a delicada situación económica tamén se fixo notar, recoñece que 2010 "é un momento especial para abrir un negocio, sobre todo tendo en conta o pulo do Ano Santo".

Por iso, o desembarco de Pousadas de Compostela no Franco non vai quedar aí. De cara ó vindeiro mes de xullo, o grupo prevé poñer en marcha outro establecemento no número 31 da mesma rúa. Chamarase O Boteco e baseará a súa carta en suculentas tapas e racións.

local@elcorreogallego.es