A manifestación congregou cincuenta mil persoas, segundo a Policía Local de Santiago, e máis de cen mil, de acordo coas cifras dos convocantes FOTO: Mon

"Un forward (cara a adiante en inglés), porque sabemos idiomas, e logo!", gritaba irónica a actriz Isabel Risco desde o palco, pasadas as dúas e cuarto da tarde, para animar a abandonar a praza e deixar sitio para os que viñan detrás. A Quintana volveu onte quedar pequena para os miles de manifestantes que saíron á rúa en defensa do galego e, como o pasado 17 de maio, foi necesario unha segunda función de discursos, que concluíu sobre as tres.

Entre un pase e outro, e a xente que quedou a medio camiño, a organización contabilizou uns 100.000 manifestantes, a metade segundo a Policía Local. É o dobre, en calquera caso, que o Día das Letras Galegas. Daquela A Mesa, a entidade convocante, estimou que saíran á rúa unhas 50.000 persoas e a Policía, 20.000. Onte, con case 500 organizacións chamando á mobilización, coas primeiras medidas en política lingüística da Xunta xa executadas e un sol radiante, as previsións de participación da organización non se viron defraudadas.

A marcha de Queremos Galego clamou contra a política lingüística do Executivo de Alberto Núñez Feijóo e esixiu o cumprimento da Lei de normalización lingüística e do Plan de normalización, acordado por consenso no Parlamento en 2004, pero do que agora a Xunta renega en puntos como os referidos á educación. "Por primeira vez na historia, un Goberno autonómico encabeza o ataque ao galego", denunciou desde o palco a actriz Patricia Vázquez, unha das portavoces da plataforma.

Medidas positivas anuladas

Vázquez, que culpou a Xunta de anular as medidas positivas para o galego e "os dereitos lingüísticos que nos asisten", puxo como exemplos "a mal chamada" consulta ás familias sobre o uso do galego no ensino (o punto de partida para derrogar o decreto que establece que o 50% do horario lectivo se desenvolva en galego); a supresión das axudas á tradución de libros ou a reforma da Lei de función pública para suprimir a obriga de realizar polo menos unha proba das oposicións no idioma de Galicia.

Ante medidas deste tipo, todos os portavoces da plataforma advertiron que o PP terá que facer fronte a un "amplo corpo social", heteroxéneo na súa composición, ideoloxía e sensibilidades, e incluso no uso do galego, pero común na súa defensa. "O galego une a todas e a todos os galegos", engadiu o presidente da Mesa, Carlos Callón, que lle pediu a Feijóo que aparque "a prepotencia, a arrogancia e as políticas galegófobas, porque un presidente serio e responsábel escoita a sociedade".

Queremos Galego conseguiu por primeira vez sumar diferentes tendencias políticas, rompendo a idea de que a defensa do galego é cousa do nacionalistas. Deixando atrás o esvarón verbal sobre a toponimia coruñesa, non faltou á protesta o secretario xeral do PSdeG, Manuel Vázquez. Estivo acompañado por deputados e compañeiros de partido, como o alcalde de Santiago, Sánchez Bugallo, aínda que non se viu ao coruñés, reenganchado á batalla de La Coruña.

"Feijóo supón o maior perigo que ten o galego neste momento. Nunca antes na historia se deu a circunstancia de que un presidente fose o inimigo público número un do noso principal sinal de identidade", declarou Manuel Vázquez.

De par del, o ministro de Xustiza, Francisco Caamaño, expresábase en termos similares á pregunta de se cre que corre perigo a Lei de normalización lingüística: "Cun Goberno con escasa sensibilidade en defensa da nosa lingua creo que pode estar en perigo case todo, pero espero que todos os galegos nos poñamos de acordo para defender o noso". O voceiro nacional do BNG, Guillerme Vázquez, cualificou, pola súa parte, de extremista a política lingüística da Xunta e cominou a Feijóo a "volver ó consenso e rectificar".

. icasal@elcorreogallego.es