O escritor Carlos G. Reigosa, nacido en 1948 na parroquia de San Xoán de Lagoa, no concello lucense da Pastoriza, continúa a un ritmo imparable a súa importante traxectoria como creador literario. Se no 2008 gañaba o Premio Torrente Ballester de novela co texto A vida do outro, publicada en maio do 2009 en Edicións Xerais de Galicia, fai oito meses, en novembro do mesmo ano, era a Editorial Galaxia a que publicaba a súa fermosa colección de relatos, Xentiario. Agora acábanos de sorprender moi gratamente con outra intrigante novela, A lei das ánimas. A novela da Santa Compaña, que hai apenas unhas semanas viu a luz, de novo, da man de Galaxia. Sempre que un escribe sobre Carlos G. Reigosa sente a tentación de mirar cara atrás e rememorar grandes fitos literarios na vida do autor, como o Premio Xerais que gañou en 1984 coa súa espectacular novela Crime en Compostela, ou o Premio Internacional Rodolfo Walsh de Literatura Testimonial de 1996, que recibiu pola súa obra La agonía del león. De entre os seus máis dunha ducia de libros de narrativa e ensaio, hoxe quero mencionar a súa colección de relatos Xentiario e a súa última novela, A lei das ánimas. Se hai dous anos en A vida do outro o autor facíanos un magnífico retrato xeracional e existencial do sempre complexo período da Transición, en Xentiario quixo Reigosa agasallarnos cunha escolma de doce relatos nos que algunhas das voces das súas anteriores ficcións reaparecen e acompañan nomes ilustres que van dun Don Quixote a un Caín, do pasado ao presente, da terra luguesa natal do escritor a Compostela, Coruña, ou mesmo a Madrid; da fantasía á máis próxima realidade. Todo iso outorga ao libro unha polifonía de voces e perspectivas literarias que definen a colección e responden a un único fin, que o propio autor define no limiar como “a vontade de ser, de existir, de permanecer”. Por outra banda, na súa última novela, A lei das ánimas, Reigosa achéganos á lenda da Santa Compaña, que no libro vólvese mito e personaxe. É unha novela de crenzas e supersticións desde a máis fresca das miradas contemporáneas. Amor, vida, morte, crime, misterio, investigación, terror, lenda, crenza e fantasmagoría son só algúns dos ingredientes dun texto que viaxa dacabalo do relato detectivesco, da novela de intriga, do xénero negro e da tradición popular á vez. Reigosa é un artesán da palabra, o que fai que as súas obras reivindiquen o poder sedutor da escritura. Atopámonos fronte a un autor que se move con igual soltura no ámbito da reflexión política (coas súas colaboracións asiduas na prensa), como no da creación literaria, cunha produción que debe ser referencia obrigada na nosa literatura.

Xentiario/ A lei das ánimas,
Carlos G. Reigosa,
Galaxia, 2009/2010, 128/224 páxs. 12 €/16 €