O Ramón Piñeiro recoñece a defensa da lingua da RAG

O presidente da Real Academia Galega, Xosé Luís Méndez Ferrín, na RAG . FOTO: Cabalar

Como mostra recoñecemento pola súa contribución "a prol da defensa e potenciación da lingua e cultura galegas a través dun século de actividade fecunda", o xurado do premio Facer País-Ramón Piñeiro López decidiu entregarlle o undécimo galardón a Real Academia Galega.

A institución académica recibirá o premio impulsado pola asociación cultural Val de Láncara a finais de outubro.

Na resolución, que fixo público onte o secretario do xurado, Carlos López Sierra, recoñécese que "mesmo en tempos nos que as adversas circunstancias de rexeitamento e negación da identidade e dos valores propios dunha Galicia na que o pobo soubo conservar o seu rico patrimonio, acharon na Real Academia Galega e nos seus académicos, como expresión institucional e de rigor científico e intelectual, a máis axeitada canle de manifestación dos valores propios".

Os convocantes do premio aproveitaron onte a súa comparecencia para amosar a súa preocupación pola situación difícil que están atravesando o semanario A Nosa Terra, que recibiu este galardón, e outros medios.

Sobre o galardón, o xurado explica tamén na resolución que "a RAG ergueu, con escaseza de medios, e fronte a malevolencias e inxustificadas retesías, a autoridade e o exemplo do seu traballo dignificador e comprometido, especialmente cando, como sucede recentemente, se pretende ignorar e ir en prexuízo da creación colectiva máis significativa e preciada do pobo galego: a lingua galega".

O xurado estivo formado por representantes de catorce asociacións e entidades culturais da comarca de Sarria, Val do Neira e o Corgo, o CEIP Ramón Piñeiro de Láncara, o Centro Unesco de Sarria e o Concello de Láncara.

Noutras edicións o premio recoñeceu o labor de Isaac Díaz Pardo, Luís Tosar, Avelino Pousa Antelo e Luz Pozo Garza.