A decimoquinta edición do Salón do Cómic da Coruña está sendo todo un éxito, segundo explicou en Radio Obradoiro o seu subdirector. "É unha satisfacción ver que cada vez ven máis xente e que ao mesmo tempo é un espazo de encontro para os profesionais". Carlos Portela sinalou que entre as propostas deste ano, cabe destacar a participación do Premio Nacional de Cómic de Barcelona José Domingo, o catalán Rubén Pellejero, o debuxante serbio Guéra, o Premio Nacional de Cómic  Bartolomé Seguí  ou Homs,  autor "que levará a cómic a triloxía Millenium de Stieg Larsson".

Portela salientou ademais que o público poderá desfrutar das exposicións monográficas durante uns días máis trala clausura de 'Viñetas desde o Atlántico' o día 12 . "O público poderá ver unha mostra de orixinais de Batman que coincide coa terceira película de Christopher Nolan e tamén unha exposición que conmemora o vinte aniversario da publicación en cómic de Dragon Ball Z". Sobre esta última, Portela explicou que foi un fenómeno que trascendeu o ámbito da historieta e tocou prácticamente a toda unha xeración"

Sobre a situación do cómic galego, Portela explicou que "por sorte medrou moito nos últimos anos e algúns dos autores emerxentes xa son profesionais de gran nivel como é o caso de José Domingo". Segundo dixo "o cómic galego goza dunha saúde excelente. É un dos poucos sectores nos que polo de agora non hai moita crise". Apuntou que a globalización "permite que os autores poidan traballar para o extranxeiro dende a súa casa". Salientou tamén a creación en Pontevedra dunha escola profesional de cómic da man de Kiko da Silva.