A CIG cifrou nun 75 por cento o seguimento da folga convocada para hoxe no naval da provincia de Pontevedra polo sindicato nacionalista, o maioritario no sector, mentres que a patronal reduciu a participación ó 5 por cento. 

O responsable da CIG no sector, Miguel Anxo Malvido, mantivo que a maioría dos estaleiros viron como a súa actividade se atopaba "paralizada", fóra de Metalships, onde recoñeceu que a incidencia do paro foi menor.

Pola súa banda, o voceiro da Asociación de Industriais Metalúrxicos de Galicia (Asime), entidade que representa a 270 empresas, Enrique Mallón, trasladou a "satisfacción" da clase empresarial ó asegurar que as firmas pertencentes á industria auxiliar -que aglutina o 80 por cento dos traballadores do sector- traballaron "ó cento por cento" e que os nove estaleiros da provincia mantiveron unha actividade "case plena", salvo Hijos de J. Barreras, que operou ó 50 por cento da súa capacidade.

Respecto diso, Mallón desvelou a existencia de "presións" por parte da CIG para que os empregados desta compañía non accedesen ós seus postos á primeira hora da mañá. 

Esta denuncia tamén foi destacada polo voceiro de CCOO no sector, Ramón Sarmiento, que recriminou á CIG que "ameazase" a aquelas persoas que rexeitaron secundar o paro cando entraban nas empresas á primeira hora da mañá. Ademais, afirmou que membros dos piquetes ata "zarandearon" e "empuxaron" algúns empregados, que ó seu entender tiveron "moito valor" ó acudir hoxe ós seus postos. 

Pola súa banda, o representante de UXT, Diego Atanes, precisou que cinco dos nove estaleiros -Metalships, Vulcano, Armón, Armada e Factoría Naval de Marín- que alberga a provincia de Pontevedra desenvolveron a súa actividade "con absoluta normalidade" e que o resto realizaron un seguimento "disperso" da folga, polo cal considerou que a cifra achegada pola CIG "non é real".