Tres mil euros en premios no desfile de Vimianzo

O concurso de disfraces terá lugar na Praza do Concello a partir das 17.30 horas e repartirá en premios máis de 3.000 euros. O evento reunirá a veciñanza e visitantes nunha tarde marcada pola música, a creatividade e o ambiente festivo propio destas datas.

O certame contará con diferentes categorías, entre as que se inclúen disfraces individuais infantís e adultos, parellas, familias empadroadas no municipio, grupos e comparsas. Os premios oscilarán entre os 20 e os 1.000 euros en función do número de participantes de cada modalidade, recoñecendo o esforzo, a orixinalidade e a posta en escena das persoas e colectivos participantes.

Previamente, o ambiente será caldeado con diferentes pasarrúas e espectáculos de animación en vivo.

As inscricións poden realizarse tanto a través da sede electrónica do Concello como no rexistro municipal. Desde a organización lembran que as coreografías que se presenten durante o desfile non poderán superar os oito minutos de duración, xa que exceder ese tempo suporá a descualificación.

Especial Entroido 2026

Especial Entroido 2026

Para garantir un Entroido apaixonante para todos os públicos, Vimianzo impulsa un programa de conciliación familiar dirixido á rapazada de 3 a 12 anos. As actividades serán os días 16,17 e 18 de febreiro no pavillón municipal, entre as 10.00 e 14.00 horas. Haberá xogos, manualidades e diferentes propostas de entretemento. A inscrición está aberta ata este xoves na casa da cultura. O prezo por cada praza é de quince euros. n