El Correo Gallego

Noticia 8 de 12 noticia anterior de A Baña Área de Compostela » A Baña

A homenaxe á muller rural e a II Festa da Música da Riba aprázanse ao vindeiro sábado 23 de marzo

A homenaxe contará cunha exposición fotográfica e unha mostra da vestimenta das mulleres do rural // O xantar popular e as actuacións de grupos de música tradicional animarán a xornada

CONCELLO DE A BAÑA  | 12.03.2019 
A- A+

A asociación Nosos Aires e o Concello da Baña celebran a súa II Festa da Música cunha especial homenaxe á muller rural. Tras a decisión de pospoñer a data da troula, finalmente levarase a cabo o vindeiro sábado día 23 de marzo. A xornada contará cunha exposición fotográfica e cunha mostra da vestimenta e material dos oficios do campo da época.

Estaba previsto que a II Festa da Música da Riba se celebrara o 16 de marzo, pero ao coincidir coa ponte de San Xosé, a directiva decidiu aprazala ao vindeiro sábado 23 de marzo. A localización escollida para a celebración é unha vez máis o campo da festa de A Carballeira, na parroquia bañense.

Os festexos comezarán ás 13.30 horas coa misa cantada e continuarán co tradicional xantar popular, que cun prezo de 25 euros, ofrecerá á veciñanza un menú composto por pulpo á feira, carne ó caldeiro, bebida, sobremesa e café. As actuacións musicais animarán a troula a partir das 17.00 horas da tarde da man de grupos de música tradicional da contorna. O Dúo Rosán será o encargado de poñer o broche final ao día.

Ademais, a edición de este ano contará cunha especial homenaxe á muller que se fará a través dunha exposición fotográfica das mulleres do rural, e cunha mostra da vestimenta da época e dos materiais dos oficios do campo.

A reserva do xantar farase antes do 18 de marzo a través dos números de teléfono 656 951 734 e 686 970 956.