Petiscos a base de filloas nos locais de Boqueixón
Terán un prezo de dous euros e poderán degustarse entre os vindeiros días catro e oito de marzo á hora do xantar e da cea
A vindeira semana, entre os días 4 e 8 de marzo, Boqueixón celebrará as súas Xornadas Gastronómicas da Filloa, que van xa pola cuarta edición. Son o preludio da gran festa que terá lugar o día 10 e que combinará a proposta culinaria coa tradición do Entroido dos Xenerais da Ulla.
As xornadas foron presentadas onte na casa da concello, nun acto que contou coa presenza do alcalde Manuel Fernández Munín; o concelleiro de Servizos Xerais, Seguridade e Medio Ambiente, Jesús Sanjuás, e representantes da hostalaría local. Varios establecementos da zona van ofrecer filloas con elaboración gourmet tanto á hora do xantar, de 12.00 a 15.00 horas, como da cea, de 20.00 a 22.30.
Os petiscos terán un prezo de dous euros e incorporarán produtos de tempada e de primeira calidade. O bar restaurante O Imprevisto servirá as especialidades Filloa imprevisto e italiana; no local Vente Vindo poderán degustarse as chamadas Galemar, Galeterra e Galedoce. Na Cervexería O Vikingo a proposta leva por nome Mesturance e no Restaurante Vía da Prata; Panza Chea.
LESTEDO. As famosas filloas comezarán a prepararse coas primeiras luces do 10 de marzo e a partir do mediodía poderán degustarse soas ou acompañadas. A máquina elaborará unhas 1.500 por hora para que ningún asistente quede sen probalas. A actriz María Mera será a encargada de presentar o evento, e o xornalista de Onda Cero, Ramón Castro, pronunciará o pregón.
Tamén se imporá o mandil de honra ao pregoeiro e a outros persoeiros que contribúen ao éxito da festa. Tampouco faltarán as actuacións musicais, que durante a sesión vermouth virán da man dos grupos e charangas Ardora, Raeira, Raiola, Luz do Ilicino e O Recobío. Tamén estarán presentes as orquestras Finisterre e París de Noia, que animarán aos asistentes entre as 18:30 e a medianoite. Para esa tarde están programados ademais os atranques dos Xenerais da Ulla, que coas súas estrofas rimadas criticarán os asuntos locais máis destacados de todo o ano, sobre todo, temas políticos, deportivos ou de actualidade xeral. Servirá así de colofón ao Entroido.
Concello e organizadores animan a asistir a un evento que hoxe é un dos grandes referentes dentro das festas gastronómicas de Galicia.