Ambar activa o programa EduDiversa sobre atención á diversidade nas aulas
Persoal da asociación formará aos docentes sobre como rachar as barreiras nos centros
Ribeira. A asociación de persoas con diversidade funcional Ambar presentou onte no restaurante Baiuca de Ribeira o programa EduDiversa, un plan de asesoramento e formación sobre a atención á diversidade destinado á comunidade educativa co obxectivo de crear aulas 100 % inclusivas.
O proxecto nace da necesidade de prestar unha atención á diversidade baseada no modelo de Dereitos Humanos. Para logralo, o colectivo ofrece formación gratuíta, asesoramento e apoio na adaptación de recursos educativos.
Vai dirixido a docentes e traballadores dos centros de ensino do Barbanza, a quenes se formará sobre como mellorar a atención á diversidade nas aulas e como empezar a adaptar materiais educativos.
Tamén se asesorará na adaptación do proceso de ensinanza-aprendizaxe do alumnado con necesidades educativas e sobre a accesibilidade cognitiva e arquitectónica de cada centro.
Os participantes na iniciativa coñecerán metodoloxías innovadoras para a inclusión dentro da aula ordinaria e crearán itinerarios personalizados de apoio educativo utilizando tecnoloxías interactivas.
Na presentación, á que acudiron medio cento de persoas, participaron a presidenta de dita entidade, Milagros Rey, xunto con Laura Sieira e María Gómez, mestra e psicopedagoga da asociación, respectivamente; e Natividad Bouzas, xefa do Servizo de Inclusión e Orientación Educativa da Xunta. O programa conta ca colaboración da Fundación Obra Social La Caixa.
Ambar leva máis de tres décadas traballando na sensibilización sobre a diversidade funcional.