Os concellos do Barbanza recibiron máis de 13 millóns de euros do Plan Único da Deputación

O presidente da Deputación da Coruña, Valentín González Formoso, realizou este xoves unha visita instucional na Pobra para comprobar o resultado dalgunhas das obras financiadas no Plan de Obras e Servizos (POS) da institución provincial. Durante a súa visita, Formoso reivindicou a contribución da Deputación para a mellora de infraestructuras e servizos públicos e anunciou un importante incremento do 72% do orzamento do Plan Único para 2025.

A Pobra mellorará a accesibilidade na praia do Areal, o paseo do Campo da Alta á Lombiña e o mercado

O presidente da Deputación foi recibido polo alcalde da Pobra, José Carlos Vidal, na casa consistorial, onde asinou no libro de honra do Concello e recibiu tamén a medalla do Museo Valle-Inclán como agasallo institucional. Ademais, participou nunha reunión con varios membros da corporación municipal, na que analizaron os investimentos e necesidades da localidade. Posteriormente, Formoso visitou xunto ao alcalde e a concelleira de Obras, Patricia Lojo, algunhas das obras financiadas pola Deputación no municipio como a mellora integral do núcleo de Mirandela ou as obras de reforma da contorna do cruceiro de Abuín-San Isidro.

Formoso destacou que a Deputación presta "un apoio fundamental para o financiamento de obras e servizos nos municipios nun momento no que a Xunta carga cada vez máis competencias aos concellos sen dotalas dos fondos que necesitan". Neste sentido, sostivo que o Plan Único "supuxo multiplicar entre tres e catro veces os fondos que reciben os concellos por parte da Deputación, o que permite que municipios como A Pobra modernicen as súas infraestruturas e presten máis e mellores servizos á cidadanía".

Máis de 13 millóns para o Barbanza

O presidente da institución provincial sinalou que os concellos da comarca do Barbanza recibiron este ano máis de 13 millóns de euros do POS+2024 e que se executarán un total de 66 obras con eses fondos, das que 14 serán no concello da Pobra. Entre estas actuacións estarán proxectos como as melloras de accesibilidade na praia dos Areos e da praza de abastos, a pavimentación de viais no polígono da Tomada, a construción dun novo centro cultural en Santa Cruz ou as melloras no entorno da praia da Lombiña, entre outras.

Formoso destacou que este apoio da Deputación aos municipios "favorece o acceso aos servizos sociais, á cultura ou o deporte, de forma que os concellos máis pequenos poden contar con persoal para ofrecer servizos de calidade, ao nivel das vilas e cidades con máis poboación e recursos". Ademais, sinalou que o orzamento do Plan Único do 2025 incrementarase nun 72%, pasando de 50 a 86 millóns de euros.

Pola súa parte, José Carlos Vidal destacou que, ademais da contribución da Deputación á creación de emprego e á mellora dos servizos municipais, o POS+ supón "unha importante axuda que nos permite levar a cabo determinadas obras que doutra forma non poderiamos facer porque as axudas que temos de outras administracións non son suficientes para permitirnos facer cousas".