Rianxo pon a disposición de produtores, comerciantes e emprendedores sete postos na praza de abastos

O Concello de Rianxo pon a disposición de produtores, comerciantes e emprendedores sete postos na praza de abastos. «É unha fantástica oportunidade para que aquelas persoas que están pensando en botar a andar un negocio ou en ampliar o que xa teñen poidan acceder a un espazo comercial nunhas condicións moi ventaxosas», dixo o alcalde, Julián Bustelo.

"Carnes e peixes como na actualidade, ou outros como froitas, verduras ou pan, son só algún dos produtos que se poden vender no noso mercado, o cal está chamado a ser un referente en canto á venta de produtos frescos e de proximidade", destacou Bustelo.

Nos últimos meses o mercado municipal de Rianxo acolleu novos inquilinos e ademais leváronse a cabo diferentes actuacións de mantemento coa finalidade de conservalo no mellor estado posible de cara ás persoas que fan uso del a diario.

As persoas interesadas en facerse cun dos postos vacantes pode poñerse en contacto co Concello de Rianxo para obter toda a información necesaria.