Un novo vial ‘osixena’ o tráfico na contorna dos Xulgados de Ribeira

O Concello de Ribeira puxo en marcha a reorganización do tráfico rodado na contorna dos Xulgados co obxectivo de gañar fluidez na circulación e aumentar as prazas dispoñibles para o estacionamento de vehículos.

A rúa Mariño de Rivera pasa a ser de dobre sentido de circulación, co traslado dos actuais estacionamentos da marxe esquerda á dereita. Este cambio facilitará o acceso tanto aos Xulgados como á sede da Policía Local, mellorando a mobilidade do tráfico na zona.

Ademais, as rúas Barbanza, Feira e Pedro Arias modifican o seu sentido de circulación. Con esta nova configuración, as persoas residentes e usuarias dos servizos públicos poderán optar por saír cara á avenida Miguel Rodríguez Bautista, como ata o de agora, ou pola avenida da Constitución. Esta última opción será posible grazas á apertura ao tráfico, na xornada deste xoves, da prolongación da rúa Barbanza, que discorre por diante dos Xulgados e por detrás do auditorio e na que se habilitaron quince prazas de estacionamento. 

Esta reordenación do tráfico enmárcase nun proxecto máis ambicioso de mellora da mobilidade urbana que inclúe a reforma integral, xa en marcha, da Praza do Centenario (xunto á que se ubica o novo auditorio). Esta actuación froma parte dunha estratexia para mellorar a mobilidade urbana entre ese espazo, o parque de Abesadas e as prazas do Concello, de España (ubicada na zona do Rueiro) y de Uxío Novoneyra.

Unha actuación que foi deseñada polo estudo 2C Arquitectos e adxudicada á UTE Gestión Ambiental de Contratas S.L.-Prace Servicios y Obras S.A. por un importe de 1.118.766 euros. O proxexto incluirá, así mesmo, a dotación de nova iluminación.