Boiro, Rianxo e A Pobra únense a prol da inserción laboral

Os alcaldes de Boiro, José Ramón Romero; Rianxo, Julián Bustelo; e A Pobra, José Carlos Vidal, visitaron o Centro de Formación e Viveiro de Empresas de Espiñeira para coñecer a evolución dos programas formativos que se están a desenvolver de forma conxunta entre os tres concellos. 

Un é o Programa Integrado de Emprego, destinado a 100 persoas da comarca inscritas como demandantes de emprego que, durante 12 meses, están a recibir formación específica acorde aos sectores produtivos da zona; así como outras xornadas destinadas a mellorar as habilidades de empregabilidade e inserción laboral. Na pasada edición acadouse con este unha inserción laboral do 68%.

Boiro, Rianxo e A Pobra lanzan un Programa Integrado de Emprego conxunto para formar a un centenar de persoas sen emprego

«Estes programas responden ás necesidades das nosas empresas en canto a perfís profesionais e son unha aposta dos tres concellos para a integración laboral da veciñanza, o que dá como resultado unhas moi boas cifras de inserción», afirmaron os alcaldes. 

Visitaron tamén ao alumnado que participa no programa de emprego Xuventude I destinado a mozos e mozas inscritos en Garantía Xuvenil e que se están a formar en montaxe de equipos informáticos, operacións auxiliares de manutención de sistemas microinformáticos e operacións auxiliares con tecnoloxías da información e comunicación. Ambos programas están financiados pola Consellería de Promoción do Emprego e Igualdade. «É un orgullo ver os resultados dos mesmos», subliñaron os rexedores.