A patronal de Boiro acolle un almorzo formativo sobre as axudas ao comercio

A Asociación Boirense de Empresas acolleu unha nova edición dos Almorzos ABE, centrada en informar sobre as novas liñas de axudas para o comercio destinadas a impulsar a modernización e dixitalización do sector. 

Durante a sesión, explicáronse as diferentes liñas dispoñibles, que inclúen axudas para a transformación dixital, a mellora da eficiencia enerxética e a modernización dos establecementos comerciais. 

Á xornada formativa impartida polo xerente da asociación, Tomás Estévez, asistiron comerciantes de negocios asociados e non asociados á patronal, permitindo así que todo o tecido comercial de Boiro puidese beneficiarse da información.

Os asistentes tamén tiveron a oportunidade de almorzar xuntos e conversar entre eles, fomentando o networking e o intercambio de experiencias dentro do sector comercial local.

Desde a patronal lembran que a asociación tramita estas e outras axudas para facilitar o acceso dos comercios aos diferentes programas de subvencións vixentes.