Redeiras galegas e cántabras visitan Porto do Son

O alcalde, Luis Oujo, destacou a importancia do seu traballo, "a veces pouco visible, pero fundamental"

Luis Oujo, esquerda, durante a recepción ás redeiras. / Cedida

Porto do Son21 FEB 2025 18:55

O alcalde de Porto do Son, Luis Oujo, recibiu este venres a un grupo de redeiras da Federación Galega de Redeiras Artesás O Peirao e da Asociación de Rederas de Bajura de Cantabria, que están de visita no municipio como mostra de alianza das dúas entidades.

Na recepción participaron tamén a tenente de alcalde, María José Maroñas Sóñora, a concelleira de Cultura e Festexos, Alicia Martínez Maneiro, e o concelleiro de Deportes, Xuventude e Ludoteca, Carlos Lorenzo Blanco.

As redeiras do Cantábrico agasallaron ao rexedor cunha figura artesanal. Oujo agradeceu “este fermoso xesto” e quixo “reivindicar, visibilizar e recoñecer o importante traballo que realizan estas mulleres no mundo do mar; un labor moitas veces pouco visible, pero fundamental que é sustento de moitas familias”.

A xornada continuou coa saída a pé cara o peirao sonense, onde as redeiras foron recibidas polo patrón maior de Porto do Son, Emilio Queiruga Santamaría, e visitaron a nave das redeiras Virxe do Carme.

As redeiras visitaron as instalacións das profesionais do sector de Porto do Son. / Cedida

Logo desprazáronse ata Portosín, onde foron recibidas polo patrón maior desa localidade, Isaac Gaciño Santos, e puideron visitar a nave das redeiras.

Asimesmo, coñeceron o Museo Marea de Porto do Son e o Castro de Baroña.

As dúas asociacións participarán este sábado na Cidade da Cultura de Santiago de Compostela nunha xornada de intercambio de experiencias e análise do futuro da profesión. A dita xornada acudirán o alcalde de Porto do Son, Luis Oujo, e a concelleira de Persoal, Magdalena Pérez, como mostra de apoio e de respaldo ao sector.

“Con xornadas como esta poñemos en valor o traballo destas mulleres redeiras, que realizan unha labor centenario e que forman parte da nosa identidade e dun sector estratéxico e fundamental en Galicia”, destacou Oujo.