Amicos pon en valor o sector pesqueiro co proxecto Arousa-Lab

O Centro de Atención Integral de Amicos en Boiro foi o escenario da primeira reunión do Comité Social de Arousa-Lab, un proxecto impulsado pola asociación Amicos e a Dirección Xeral de Desenvolvemento Pesqueiro no marco de A-AAGORA, financiado por Horizonte Europa. Este encontro tivo lugar este luns 24, e contou coa participación de actores chave do sector mariñeiro da Ría de Arousa.

The Guardian se hace eco del colapso del marisco en Galicia: "Vivimos de prestaciones sociales"

Este proxecto busca poñer en valor a labor e a cultura mariñeira das comarcas da Ría de Arousa, promovendo boas prácticas no sector a través do reforzo positivo. Ademais, inclúe accións de restauración do fondo mariño, con especial atención á recuperación de gorgonias e bosques de laminarias.

O encontro contou coa presenza da directora territorial na Coruña da Consellería do Mar, María José Cancelo; o director xeral de Amicos, Xoán España; Rosa Chapela e Anxo Mena, do Centro Tecnolóxico do Mar (CETMAR); a responsable de I+D+i de Mexillón de Galicia DOP, Ángeles Longa; os patróns maiores das confrarías de Ribeira e a Illa de Arousa, José Antonio Pérez e Juan José Rial; así como técnicos das confrarías de Cambados e Noia.

Durante a xornada, María José Cancelo destacou que Arousa-Lab busca ser "un espazo de diálogo onde todos os actores sociais que forman parte da Ría de Arousa e do seu desenvolvemento pesqueiro, marisqueiro e acuicultor, poidan falar da súa experiencia".

Pola súa banda, Xoán España, agradeceu á "Consellería do Mar por elixir a Amicos como elemento dinamizador do proxecto A-AAGORA, no que se buscan crear grupos de traballo que pensen diferente e constrúan cousas innovadoras". Ademais, engadiu que se busca "falar e poñer en valor a nosa cultura, a mariñeira, e falar das cousas que se fixeron ben ata agora, que nos supuxo, riqueza, traballo e conservación do medio".

"Estamos orgullosos do noso, das familias que traballan tanto no mar como nas actividades de terra relacionadas con este medio. Que todos contribuamos da man a que cada vez máis xente poida vivir con orgullo destes traballos, algo que hoxe intentaremos reforzar", indicou pola súa parte a responsable de I+D+i do Consello Regulador de Mexillón de Galicia DOP.

O encontro concluíu coa presentación dos proxectos medioambientais de Amicos, que inclúen accións de sensibilización, restauración do medio mariño e formación para unha xestión sostible da Ría de Arousa.