O Concello de Outes presenta as rutas culturais de primavera 2025 de 'Coñece o noso patrimonio'

O Concello de Outes anunciou este luns o calendario das rutas culturais de primavera 2025 dentro do programa 'Coñece o noso patrimonio', unha iniciativa que ofrece a oportunidade de explorar o patrimonio histórico, cultural e natural do municipio acompañado por un experto local. As rutas desenvolveranse entre abril e xuño, con saídas programadas ás 9.00 horas e contarán cunha dificultade media.

Outes estréase no 'plogging' xuntando deporte e compromiso ambiental

A primeira das rutas será o 6 de abril con ''Historia do Freixo e rego do Rial". Un percorrido de 10 quilómetros con saída no Centro Náutico do Freixo. "Torre dos Mouros e fervenzas de San Paio", de 6,5 km con saída da Igrexa de San Lourenzo, será a segunda cita o 20 de abril.

Xa no mes de maio terán lugar dúas novas rutas: o 4 de maio con "Historia apícola no val do Donas" (7 quilómetros con saída da Capela de San Adrián) e o 18 de maio con "Camiñando cara a orixe do concello de Outes" (onde se percorrerán 9 km saíndo da Eira do Carme, Brión de Arriba).

O calendario de rutas pecharase no mes de xuño coas dúas últimas citas. O 1 de xuño, con saída do aparcamento da igrexa de Roo terá lugar "Roo e o río Bendimón, historia e espiritualidade" (7 quilómetros), mentres que o 15 de xuño será o turno de "De Mirás a Carleo polo Cristo de Baneo" (7,5 km con saída da Capela do Socorro de Mirás).

Para participar será necesario inscribirse a través do formulario dispoñible na web do Concello. As prazas son limitadas, con 50 participantes por ruta, agás na ruta da "Torre dos Mouros e fervenzas de San Paio", que contará cun máximo de 25 persoas. As inscricións abriranse o luns anterior a cada ruta.