O Concello de Porto do Son finaliza as obras de saneamento e depuración na zona sueste da Atalaia

O Concello de Porto do Son vén de finalizar as obras de saneamento e depuración na zona sudeste da Atalaia. O proxecto, que contou cun investimento de 59.395,88 euros financiado a través do Plan de Obras e Servizos (POS) da Deputación da Coruña, soluciona unha problemática en tres rúas da localidade como son Campo A Través, Sotavento e Paseo do Brañón.

Os traballos incluíron a instalación dun novo sistema de depuración, que incorpora unha arqueta de desbaste, unha fosa-filtro e un pozo de toma de mostras, garantindo así unha mellor xestión das augas residuais. Ademais, creouse un novo colector principal que parte do pozo existente na esquina sueste da rúa Campo a Través e conecta coa nova depuradora. Para ampliar a cobertura, instalouse un ramal secundario que dá servizo a dúas vivendas do Paseo do Brañón.

Así mesmo, a intervención tamén contemplou a reposición dos pavimentos afectados durante as obras, garantindo a recuperación estética e funcional das rúas implicadas.