SEA e o Concello de Ribeira avanzan na viabilidade do novo polígono empresarial

O Concello de Ribeira e a entidade Solo Empresarial do Atlántico (SEA) deron un paso máis na procura de solucións para o novo parque empresarial da localidade. Nunha reunión celebrada este martes nas oficinas de SEA, Beatriz Sestayo, xerenta da entidade, recibiu ao alcalde de Ribeira, Luís Pérez, e á concelleira de Economía e Facenda, María Herminia Pouso, acompañados por integrantes do equipo técnico de SEA, entre eles José Rey, responsable da área comercial e o abogado Antonio Quintela.

O obxectivo do encontro foi analizar as mellores opcións para viabilizar o novo polígono de Ribeira, ante a crecente demanda de solo empresarial na zona. Durante a reunión, o rexedor presentou o proxecto de urbanización co fin de que os expertos de SEA poidan estudalo en detalle e valorar posibles solucións.

Beatriz Sestayo comprometeuse a elaborar unha proposta que permita desbloquear os obstáculos que arrastra o polígono. "Temos que esforzarnos en buscar respostas a este parque non só para atender a demanda empresarial senón tamén porque é unha forma de fixar poboación e outorgar un futuro mellor para Ribeira", destacou.

Pola súa banda, Luís Pérez subliñou a importancia deste proxecto para o crecemento económico da comarca do Barbanza: "A creación de solo industrial atraerá novas empresas e tamén contribuirá á xeración de emprego e axudará a fixar poboación en Ribeira".

Ambas as dúas partes coincidiron na "urxencia" de avanzar neste proxecto estratéxico, polo que se comprometeron a manter un novo encontro no transcurso do vindeiro mes de abril.