O PSOE expulsa definitivamente o edil de Outes, José Antonio Caamaño

O instrutor do expediente, Santos Cerdán, considera que as alegacións do concelleiro «son innecesarias e impertinentes"

Imaxe de arquivo de José Antonio Caamaño nun acto do PSOE. / Cedida

Outes01 ABR 2025 20:09

Actualizada 01 ABR 2025 20:41

A Comisión Executiva Federal do PSOE vén de resolver a expulsión definitiva do edil «tránsfuga» de Outes, José Antonio Caamaño, que fora expulsado provisionalmente despois de suscribir unha moción de censura no seu Concello fóra das canles da organización.

A resolución, asinada en Madrid polo secretario de organización, Santos Cerdán, expresa que a análise das alegacións do expedientado concluíu que estas non contradín a autoría dos feitos nin os desvirtúan.

O instrutor considera que ditas alegacións «son innecesarias e impertinentes, encamiñadas unicamente a dilatar a instrución do expediente».

Ademais, enumera as múltiples veces que o agora expulsado foi notificado da apertura do expediente, tanto por burofax como por correo electrónico.

“Non pode prosperar por tanto a súa alegación de indefensión porque, ademais de cumprirse a normativa aplicable, os feitos eran públicos e notorios, como acredita unha mera revisión do publicado nos medios de comunicación e o escrito da Secretaría do Concello”, apúntase no documento.

Contra esta decisión, Caamaño poderá interpoñer recurso ante a Comisión Federal de Ética e Garantías do PSOE no prazo de dez días.

Ante esta resolución, o secretario xeral do PSdeG Provincial da Coruña, Bernardo Fernández, lembra que Caamaño «adoptou a decisión de apoiar unha moción de censura do PP sen ningún tipo de consulta ao partido nin de aprobación, xa non só das instancias superiores do mesmo, senón da propia agrupación local». «Por todo isto, é un tránsfuga e resulta lóxica e normal a súa expulsión do Partido Socialista», dixo.

Xunto co BNG, Caamaño formaba parte do Goberno local liderado polo anterior alcalde, Manuel González, de Compromiso Outes, tras apoialo na investidura en 2023. Con todo, en febreiro anunciou a súa marcha do tripartito e logo apoiaría a moción de censura que deu o bastón de mando ao popular Francisco Calo.