Ribeira é o primeiro concello galego adherido á rede de voluntarios Cardi@ngel, formados en reanimación cardiopulmonar

Ribeira converteuse este xoves no primeiro concello galego adherido a Cardi@ngel, un proxecto pioneiro para tecer unha rede de voluntarios capacitados en facer reanimación cardiopulmonar.

Jesús Velasco, director técnico da startup Cardi@ngel, explicou un proxecto que ten como lema As túas mans poden salvar unha vida.

Os veciños e veciñas de Ribeira poden xa descargar a aplicación en www.cardioangel.es, a través da cal, quenes necesiten axuda urxente, poden lanzar unha petición de auxilio cun só click no seu smartphone.

Esa petición chégalles aos usuarios de Cardi@ngel, que reciben a alarma e a través do xeolocalizador saben quen a envía e onde está exactamente.

«Os primeiros minutos son fundamentais para salvar unha vida, e as ambulancias moitas veces non chegan a tempo», explicou Jesús Velasco, quen puxo en marcha esta iniciativa «tras perder un bo amigo por un infarto».

Nas próximas semanas, as asociacións e colectivos de Ribeira recibirán formación en reanimación cardiopulmonar, co obxectivo de que a rede de usuarios de Cardi@ngel sexa a maior posible.

De feito, xa hai sesións de formación pechadas para a próxima semana, coa colaboración da Policía Local de Ribeira. Os veciños interesados en formarse só teñen que descargar a aplicación e seguir o apartado de News. Cardi@ngel foi galardoada cun dos premios nacionais DKV Impacta.