O boirense Pazo de Goiáns acollerá o día 15 de maio un campionato de baristas

Catorce alumnos de sete centros de educación especial farán varias elaboracións a base de café

Pola esquerda, Juan Carracedo, María Outeiral e Alfonso Aguado. / Cedida

Boiro24 ABR 2025 17:37

O Pazo de Goiáns (Boiro) acollerá o 15 de maio o III Campionato Barista de Colexios de Educación Especial que organiza o CEE Manuel López Navalón. Trátase dun campionato que se celebra na especialidade de servizos de restauración dos programas formativos de centros de educación especial de toda Galicia.

Nesta edición participan os centros Manuel López Navalón (Santiago), Infanta Elena (Monforte de Lemos), Paxón (Nigrán), Saladino Cortizo (Vigo), Pontevedra (Pontevedra), María Mariño (A Coruña) e Terra de Ferrol.

O campionato comezará ás 14.45 horas e será retransmitido en directo mediante a canle de YouTube de Café Templo. Participarán 14 alumnos e alumnas, 2 de cada centro, que farán varias elaboracións a base de café.

Esta cita serve de apoio a escolas e centros de hostalería de educación especial de Galicia.

Na presentación do campionato participaron a concelleira de Cultura, María Outeiral; o representante de Cafés Templo, Alfonso Aguado; e o representante do CEE Manuel López Navalón, Juan Carracedo.