A Pobra celebrará o Día da Danza cun espectáculo no que participarán cincuenta bailaríns

A concelleira de Cultura da Pobra do Caramiñal, Patricia Lojo, presentou o espectáculo Emociónate co baile, unha actividade de danza do Taller Alecrín, aberta á veciñanza, que ten como obxectivo emocionar e conectar a espectadores con danzantes.

“A danza ten numerosos beneficios, tanto físicos como emocionais e sociais. Favorece traballar a musculatura, axuda a reducir o estrés e a ansiedade, ao facernos pasar un momento

divertido, e ao ter que asistir ás clases e estar entre un grupo de persoas axuda a mellorar as habilidades sociais, coñecer xente nova e crear novas relacións. Por iso apostamos por esta actividade e intentamos que saia adiante”, explicou.

Lola López, presidenta do Taller Alecrín, sinalou que “dende o Taller Alecrín, o que queremos é poñer en valor a importancia do baile en todos os sentidos e para todos. O que pretendemos con este tipo de citas é darlles aos nosos alumnos, que non son normalmente os protagonistas, a oportunidade de pasar o día coa xente nunha clase co protagonismo que merecen.”

Francisco Muñiz, director técnico do Taller Alecrín, explicou en que consiste a actividade: “O baile é unha actividade transversal, que xunta xente en diferentes circunstancias. Emociónate co baile é unha mostra de Line Dance e Baile Social, a nosa etiqueta para o baile en grupo, onde misturamos varios estilos. O fío deste ano é o da emoción e o sentimento que xera a xunta de danza e narrativa, e tirando del imos facer un percorrido por diferentes bailes e ritmos expresando a emoción que produce nos que o miran e nos que o facemos”, dixo.

Como idea final sobre a o concepto da actividade, o director técnico cita a Mikhail Baryshnikov, persoeiro escollido este ano para dar a mensaxe do Día da Danza: “Dise a miúdo que a danza pode expresar o inenarrable. A ledicia, a dor e o desespero fanse visibeis. Expresións encarnadas da nosa fraxilidade compartida. Nese senso, a danza pode espertar empatía, inspirar bondade e fomentar en nós o desexo de sandar na vez de danar”, explicou.

O evento terá lugar o xoves, 1 de maio, a partir das 17.00 horas na Praza Alcalde Segundo Durán, en caso de que o permita o tempo, á que se pode achegar toda a veciñanza. No caso de

chuvia, a actividade trasladarase ao colexio Salustiano Rey. Será en formato de clase aberta, con explicacións e introducións antes de cada unha das doce intervencións, nas

que participarán un total de 50 alumnos.